وحي الشعر


________

كَطعت ويه القصايد كَطع سباح
هــــديت الشعر والشعر هدني
كَلت هم زين الم شراعي وارتاح
ماطول على جرف الشط بعدني
ببحور الشعر نص عمري ملاح
جرف يريدني وجرف اليصدني
تعب مجذافي بيدي وتعبت الراح
وثچيل الروج وملاكَاه ضهدني
بعد مابي الم هموم وجــراح
ولا اصرفن لهذا وذاك ردني
ولاحيل البعد لمشاكَف ارماح
ولا محبوب اوده ومـــا يودني
جمعت اشعار عمري بخانة الراح
وكلت وحي الشعر يحلم يجدني
رجع ليه على غفله ومن بعد لاح
اجـــــــاني وكلت متوهم فكدني
لذِت عنه وتدنه وصحله ملواح
درت وجهي وسحل ثوبي ونشدني
مـــا عندك الباب الشعر مفتاح
چذب شاعر اصل يمه ويردني
تعذرته وجزاني وخزرته سلاح
يچن وعد الخصم للضد وعدني
اجه بطيف اليجفل الحيد لوصاح
وعبر عاليمه واليمي وكَصدني
شبخ فوكَي مثل قباض الارواح
وتخيلنـــي مهر ليل ولكدنــي
اخـــذني الكربلا والفجر ما لاح
ولوانــي بثاية الطف وعكَدني
كَــال اكتب شعر مو كفل مداح
حچي الماصخ بتر عودي ومردني
بشطني بجلمته مو كالهه وراح
يجن سيفه وكعد بالفي يحدني
كَتله ابشر اذري الحچي بمرواح
والكَط عينته وعدني اشتعدني
انا على حسين اطيرن بالسما جناح
ولا همني اليذمني من الحمدني .


للشاعر كريم الجسار